13.08.1911 г. у   в.Малышкаўшчына  Ашмянскага  раёна  Гродзенскай вобл. нарадзіўся  Склубоўскі Вікенцій Аляксандравіч, палітычны і грамадскі дзеяч, удзельнік беларускага і польскага прагрэсіўнага руху  Заходняй Беларусі.. Паходзіў з беднай сялянскай сям’і. Закончыў мясцовую школу і сямігодку ў м.Гальшаны, вучыўся ў Віленскай гімназіі. Закончыў факультэт права Віленскага ўніверсітэта (1939). Будучы студэнтам распачаў сваю палітычную дзейнасць. У 1935 г. уступіў у таварыства беларускай школы (ТБШ). На з’ездзе В.Склубоўскі  быў абраны старшынёй Цэнтральнага гуртка ТБШ у Вільні і членам Галоўнага праўлення арганізацыі. Адначасова таварышы з КПЗБ даручылі  яму ў канцы 1935 г. абавязкі галоўнага і адказнага рэдактара легальнай газеты Камуністычнай партыі Заходняй Беларусі “Наша воля”, якая выступала супраць фашызацыі грамадскага жыцця буржуазнай Польшчы, змяшчала артыкулы на абарону беларускай нацыянальнай культуры, мовы, друкавала творы беларускіх пісьменнікаў – М.Танка, М.Васілька, М.Засіма, М.Машары, А.Іверса.

      У часы гітлераўскай акупацыі В.Склубоўскі быў вывезены на прымусовыя работы ў Германію. Вызвалены Савецкай Арміяй  у Вроцлаве і адразу паступіў на працу ў Вроцлаўскі апеляцыйны суд. У 1957 г. пераехаў у Беласток, дзе доўгі час працаваў ваяводскім суддзёй.

      Узнагароджаны  залатым “Крыжам Заслугі”, медалямі 10-годдзя ПНР і 1000-годдзя Польшчы, знакам “Заслужаны для Беласточчыны” і інш.

Крыніцы інфармацыі: