30.11.1922 г. у в.Данілаўск Мсціслаўскага р-на Магілёўскай вобл. нарадзіўся Крайноў Міхаіл Іосіфавіч (1922–2016), педагог, Ганаровы грамадзянін г.Ашмяны (2014), удзельнік Вялікай Айчыннай вайны. У 1937 г. скончыў сямігодку і паступіў у Мсціслаўскае педагагічнае вучылішча. Перад самай вайной быў прызваны на службу ў рады Савецкай Арміі, першае месца  службы – 30-ы  стралковы  полк, станцыя Рада Тамбоўскай вобласці – стралок. Ваяваў з першага дня вайны і да заканчэння ваенных дзеянняў з Германіяй. Прымаў удзел у бітве за Маскву. Удзельнічаў у вызваленні Украіны,  Польшчы. Перамогу сустрэў у Берліне. 9 мая 1945 г. дэмабілізаваны. За ваенныя заслугі ўзнагароджаны ордэнам Чырвонай Зоркі, Айчыннай вайны 2-й ступені, медалямі “За адвагу”, “За абарону Масквы”, “За перамогу над Германіяй у Вялікай Айчыннай вайне 1941 – 1945”.

       Пасля вайны жыў і працаваў настаўнікам (дырэктарам) у вёсцы Жупраны Ашмянскага р-на. Праводзіў вялікую працу па патрыятычнаму выхаванню падрастаючага пакалення. Часта сустракаўся з дзецьмі і моладдзю, дзяліўся ўспамінамі аб вайне.

Крыніцы інфармацыі:

1. Крайноў Міхаіл Іосіфавіч // Краязнаўчы каляндар Ашмяншчыны на 2017 год/ склад. Г.У. Палубінская.–Ашмяны, 2016.– С. 37.

2. Почетные граждане  https://oshmiany.gov.by/ru/pochetnye-grajdane-ru

       30.11.1768 г. у мястэчку Жнін Гнезненскага ваяводства, цяпер горад у Куяўска-Паморскім ваяводстве, Польшча нарадзіўся Снядэцкі Анджэй (Енджэй)  (1768–1838), польскі хімік, урач, асветнік, філосаф. 

       Пасля заканчэння школы (1787) паступіў на матэматычнае аддзяленне Кракаўскай акадэміі, але ў хуткім часе перайшоў на медыцынскае. Прадоўжыў вучобу ў Італіі ў Павійскім універсітэце, абараніў дысертацыю на званне доктара медыцынскіх і філасофскіх навук. Падарожнічаў па краінах Заходняй Еўропы. У 1796 г. А.Снядэцкі наведаў Вену, адкуль быў запрошаны на выкладчыцкую працу ў Віленскі ўніверсітэт.  У 1797 г. заняў пасаду загадчыка кафедры і прафесара хіміі і фармакалогіі медыцынскага факультэта ўніверсітэта, дзе працаваў да лета 1803 г., потым выкладаў хімію на фізіка-матэматычным факультэце (да 1822 г.).  За гэты час ім была падрыхтавана фундаментальная навуковая праца “Тэорыя арганічных істот”.

           Выкладаючы хімію ва ўніверсітэце, А.Снядэцкі разам са знакамітым вучоным-натуралістам Станіславам Юндзілам аснаваў выданне навуковага часопіса “Дзённік Віленьскі”, супрацоўнічаў з іншымі перыядычнымі выданнямі.

       Знясілены напружанай навуковай і выкладчыцкай працай у 1822 г. А.Снядэцкі вымушаны быў па стане здароўя звольніцца з працы ва ўніверсітэце. Да 1826 г. ён займаўся гаспадаркай у сваім памесці Вельбутова  каля Ашмян. Акрамя Вельбутова  Снядэцкаму на Ашмяншчыне належалі яшчэ памесце Раўнаполле, млын і карчма ў Харанжышках.

       Пасля 4-гадовага адпачынку ў 1826 г. А.Снядэцкі вярнуўся на выкладчыцкую працу, але цяпер ужо на медыцынскі факультэт на кафедру клінічных захворванняў, працаваў да 1832 г.,  да закрыцця ўніверсітэта. У 1832 – 1836 гг. працаваў прафесарам Медыка-хірургічнай акадэміі, адкрытай на базе медыцынскага факультэта пасля закрыцця ўніверсітэта.

       12 мая 1838 г. Анджэй Снядэцкі пасля доўгай і працяглай хваробы памёр. Пахаваны на могілках у в.Гароднікі Ашмянскага раёна каля былога свайго маёнтка. Пасля смерці  яго памесці перайшлі па спадчыне дочкам Марыі, Зофіі і сыну Юзафу. На магіле А.Снядэцкага ў Гародніках у 1839 г. быў пастаўлены помнік па заказе сына.

       Стараннямі зяця М.Балінскага творчая спадчына А.Снядэцкага была выдадзена ў 6 тамах з прадмовай збіральніка, што дае нам магчымасць блізка пазнаёміцца з асноўнымі кірункамі навуковай дзейнасці вучонага і яе вынікамі.

Крыніцы інфармацыі:

1. Коўкель, І.І. Анджэй Снядэцкі – філосаф, урач, асветнік/ І.І.Коўкель// Ашмяншчына: гісторыя і сучаснасць. – Гродна–Ашмяны, 1995. – С.79–81.

2. Коўкель, І.І. Філосаф, урач, асветнік: аб польскім вучоным-хіміку А.Снядэцкім/ І.І.Коўкель// Памяць: гіст.-дакум. хроніка Ашмянскага раёна/ рэдкал.: Г.К.Кісялёў [і інш.].. – Мн.: БЕЛТА, 2003. – С.152–154. (Іх шлях пралёг праз Ашмяншчыну).

3. Снядэцкі Анджэй (Енджэй) // Беларуская энцыклапедыя: у 18 т. Т. 15: Следавікі – Трыо / Рэдкал.: Г.П. Пашкоў і інш. – Мн.: БелЭн, 2002. – С. 72.

4. Снядэцкі Анджэй (Енджэй) // Краязнаўчы каляндар Ашмяншчыны на 2018 год/ склад. Г.У. Палубінская.–Ашмяны, 2017.– С. 35-37.