18.10.1953г. у в.Міхайлоўшчына Ашмянскага р-на нарадзілася Гіруць-Русакевіч Валянціна Францаўна (1953–2021), беларуская паэтка, журналістка. Член Саюза пісьменнікаў Беларусі (1998). Закончыла Міхайлоўшчынскую СШ (1970),  Беларускі  дзяржаўны ўніверсітэт, факультэт журналістыкі (1975). У 1973 г. сустрэла свайго будучага мужа Рыгора Русакевіча. Працу ў валожынскай раённай газеце “Працоўная слава” пачала ўжо пад прозвішчам Русакевіч. У 1997 г. прыняла прапанову ўзначаліць аддзел інфармацыі і работы з насельніцтвам Валожынскага райвыканкама. З 2004 г. і да апошніх дзён працавала ў Валожынскім раённым цэнтры культуры кіраўніком народнага літаратурна-мастацкага аб’яднання “Рунь”.

       Першыя вершы, а іх Валянціна пачала пісаць з васьмігадовага ўзросту, былі надрукаваны ў 1969 г. у Ашмянскай раённай газеце «Красное знамя». Пасля быў абласны злёт маладых паэтаў Гродзеншчыны, выступленне на 130-годдзі з дня нараджэння Францішка Багушэвіча, дзе ўпершыню пазнаёмілася з паэтам Алегам Лойкам. Калі вучылася на другім курсе, адзін з вершаў В.Гіруць з’явіўся ў калектыўным зборніку “Універсітэт паэтычны”, дзе былі прадстаўлены творы ўсіх паэтаў, пачынаючы з Паўлюка Труса, хто вучыўся ва ўніверсітэце.

       Першая кніга “Я адкрываю вам душу” выйшла напрыканцы 1996 г. ў серыі “Бібліятэка часопіса “Маладосць”. Да гэтага былі публікацыі ў часопісе “Полымя”, газетах “Рэспубліка”, “Народная газета”, “Мінская праўда”. Працуючы ў рэдакцыі валожынскай раённай газеты, Валянціна Францаўна вяла “Літаратурную старонку”, займалася з юнымі паэтамі ў літаратурным аб’яднанні “Рунь”, якому ў 1997 г. было прысвоена званне народнага. Пазней выйшлі зборнікі вершаў “Пад зоркаю лёсу” (1999), “Мовай сэрца” (2008); кнігі для дзяцей   “Каляровыя вятры” (2011), “А ці ведаеце вы?” (2013). “На нітцы часу” (2018).

       Тэматыка вершаў В.Гіруць-Русакевіч розная, але галоўная – любоў да сваёй Малой радзімы, сяброў, блізкіх, якую яна пранесла праз усё сваё жыццё і якую аддавала шматлікай чытацкай аўдыторыі пры сустрэчах у бібліятэках, школах, іншых установах.

Крыніцы інфармацыі:

1. Гіруць-Русакевіч Валянціна Францаўна // Краязнаўчы каляндар Ашмяншчыны на 2018 год / склад. Г.У. Палубінская.–Ашмяны, 2017. – С. 32-33.

2. Гіруць-Русакевіч Валянціна Францаўна // Памяць: Гіст.-дакум. хроніка Ашмянскага раёна/ рэдкал.: Г.К.Кісялёў [і інш.]. – Мн.: БЕЛТА, 2003. – С.569. (Нарадзіліся на Ашмяншчыне. Творцы).

3. Рыбік, Л. Для мяне вы ўсе – сваякі: аб сустрэчы з беларускай паэткай В.Гіруць-Русакевіч у Ашмянскай раённай бібліятэцы/ Людміла Рыбік// Ашмянскі веснік. – 2018 – 10 лістапада (№ 87). – С.5.

4. Сцяжыны майго жыцця: з успаминаў Валянціны Гіруць-Русакевіч // Памяць: гіст.-дакум. хроніка Ашмянскага раёна/ рэдкал.: Г.К.Кісялёў [і інш.]. – Мн.: БЕЛТА, 2003. – С. 569–571. (Нарадзіліся на Ашмяншчыне. Творцы).