3 ліпеня падчас раённага свята “Квітней пад небам сінім, Беларусь!” ДУК “Ашмянская раённая бібліятэка” арганізавала ў гарадскім парку бібліятэчную пляцоўку “Беларусь велічная і незалежная”, дзе жыхары горада змаглі пазнаёміцца з інфармацыяй аб дасягненнях нашай краіны, пачынаючы з часу вызвалення ад нямецка-фашысцкіх захопнікаў і да сённяшніх дзён.  Матэрыялы бвлі прадстаўлены на кніжных выставах  “Жыццё і свабоду здабывалі ў баях”, “Беларусь сёння”, “Ашмяншчына – мой край”. Прыцягвала ўвагу наведвальнікаў фотавыстава гальшанскага краязнаўцы, былой загадчыцы Гальшанскай дзіцячай бібліятэкі Лабунінай Валянціны Сцяпанаўны  “Гэты дзень мы набліжалі як маглі”, якая складалася з серыі фотакарцін, прысвечаных святкаванню ў Гальшанах  Дня Перамогі, пачынаючы з 1967 года. Цыкл фотаработ аўтар прысвяціла помнікам, устаноўленым на тэрыторыі Гальшанскага сельскага Савета, у памяць аб загінуўшых воінах. Сярод іх – помнік на месцы гібелі лётчыкаў А.Аўдзеева і П.Страленкі, а таксама магіла загінуўшага пры вызваленні салдата  Кавецкага, якая знаходзіцца на тэрыторыі царквы Георгія Пераможцы ў Гальшанах. Арганічна дапоўнялі экспануемыя матэрыялы атрыбуты ваенных часоў: салдацкая каска, планшэт, ваенная карта, кавалак калючага дроту. Як сімвал сённяшнага дня побач размясцілася дзіцячая пляцоўка з выставай  кніг, дзіцячымі цацкамі, “сухім” басейнам, у якім малышы з задавальненнем забаўляліся. Старэйшым школьнікам была прапанавана віктарына “Мая Беларусь”.