12 сакавіка бібліятэкары ДУК «Ашмянская раённая бібліятэка» сумесна з духоўна – асветніцкім цэнтрам пры Спаса-Васкрасенскай царкве г. Ашмяны правялі сустрэчу з моладдзю, прымеркаваную да Дня праваслаўнай кнігі «Святло і сіла духоўнага слова». Айцец Пётр, настаяцель Храма Уваскрасення Хрыстова разам з кіраўніком цэнтра сястрой Наталляй пазнаёмілі навучэнцаў 8 кл. УА «СШ№2» з гісторыяй цэнтра, бібліятэкай, святымі кнігамі. «Галоўная Кніга, якая аберагае нас ад зла – гэта, вядома, Біблія. Нездарма яна названа «Кнігай Кніг». Праз яе нам кажа сам Бог. Чытаючы гэтую кнігу, мы набіраемся мудрасці. Праз яе мы маем зносіны з Госпадам», — сказаў айцец Пётр. Ён распавёў прысутным аб старажытных летапісах на Русі да кнігі «Апостал», пра значэнне праваслаўнай кнігі і яе ўплыў на духоўна — маральнае развіццё, пра самыя старыя кнігі, якія ёсць у царкве. Гутарка атрымалася цікавай, пазнавальнай. Навучэнцы былі вельмі актыўныя, не саромеліся, задавалі пытанні бацюшку. У працяг тэмы сястра Наталля пазнаёміла прысутных з гісторыяй храма, Нядзельнай школы, расказала пра святых, якія аберагаюць і падтрымліваюць чалавека ў розных жыццёвых сітуацыях. У аддзле абслугоўвання і інфармацыі раеннай бібліятэкі моладзь магла пазнаёміцца з кніжнай выставай праваслаўнай літаратуры «Духовных книг божественная мудрость».